2007-2008

Október 2007:
Fálkar tóku sér frí haustið 2007 þar sem raðir liðsins voru byrjaðar að þynnast. Árni Ara þjáðist af eymslum í öxlum og þurfti að draga úr krulluiðkun, Sigfús gekk til liðs við Svarta gengið og Þorvaldur tók sér frí frá svellinu. Haraldur gekk tímabundið til liðs við Garpa.

Janúar 2008:
Fálkar skráðu lið til leiks í Bikarmóti Krulludeildar, meðal annars til að koma fjölda liða upp í jafna tölu (10). Liðsmenn: Haraldur Ingólfsson, Þorvaldur Gunnarsson, Gunnar Þorvaldsson og Jóhanna María Elena Matthíasdóttir. Liðið lék gegn Bragðarefum í fyrstu umferð mótsins, úrslitin 1-6, og féll liðið úr keppni.

Í beinu framhaldi af þátttöku í Bikarmótinu var ákveðið að slá til og skella sér í Íslandsmótið 2008 undir merkjum Fálka. Árni Ara gekk til liðs við Skytturnar. Fálkar enduðu neðstir í Íslandsmótinu, gerðu tvö jafntefli, enda samanstóð liðið að meirihluta af nýliðum í íþróttinni. Því miður er ekki til mynd af þessari síðustu útgáfu af Fálkunum sem þó eiga vonandi eftir að lifna við aftur þótt síðar verði.

2006-2007

Ein breyting varð á liði Fálka í upphafi keppnistímabilsins haustið 2006. Júlíus gekk yfir í annað lið en í stað hans kom Ómar Ólafsson inn í liðið. Liðið hóf keppnistímabilið með þátttöku í Gimli Cup - mótinu lýkur 13. nóvember. Liðsmenn, aftari röð: Árni Arason, Ómar Ólafsson og Sigfús Sigfússon. Fremri röð: Páll Viðar Árnason og Haraldur Ingólfsson.

Við upphaf Bikarmótsins í lok nóvember gekk einn af unglingunum í krullunni, Þorvaldur Gunnarsson, til liðs við liðið og varð varamaður í stað Páls Viðars.

Meira af gengi Fálka 2006-2007

Fálkar í 4. sæti

Hið blandaða lið akureyrskra og reykvískra krullumanna sem hélt utan til Englands þann 9. nóvember er komið til síns heima eftir frábæra ferð og ágætan árangur. Liðið endaði í 4. sæti af 12 liðum, vann þrjá leiki en tapaði tveimur. Litlu munaði að Fálkum tækist að ná þriðja sætinu.

Fyrri fréttir af árangri voru skrifaðar í flýti en nú er tilbúin samantekt um alla leikina, úrslit þeirra og fleira.

Smellið hér til að lesa alla samantektina.

Myndir / Photos

Englandsferð Fálka 9.-13. nóvember 2006

Fréttatilkynning vegna þátttöku liðsins á mótinu í Englandi.

Vonandi verður hægt að flytja fréttir af gengi liðsins hér á blogginu jafnóðum og leikjum lýkur. Fyrsti leikur liðsins er kl. 10 á föstudagsmorgun og annar leikurinn strax kl. 13 sama dag. Þriðji leikur liðsins hefst kl. 11 á laugardagsmorgun en tímasetningar leikja eftir það fara eftir árangri í fyrstu þremur leikjunum. Liðsmenn Fálka í Englandsferðinni verða þeir Haraldur Ingólfsson fyrirliði, Þorgeir Einarsson, Bjarni Sæmundsson og Árni Arason. Sjá nánar í fréttatilkynningu.

2005-2006

Fálkar komu saman aftur haustið 2005 eftir frí vegna uppstokkunar í tengslum við þátttöku tveggja liðsmanna í Heimsmeistaramóti 50 ára og eldri. Árni, Haraldur, Júlíus og Sigfús tóku aftur höndum saman en Ágúst kaus að róa á önnur mið.

Meira af gengi Fálka 2005-2006

Nafn liðsins - alla leið frá Winnipeg

Fálkar er ekki einungis krullulið með merkilega sögu heldur merkilegt nafn. Liðið fékk nafn eftir íshokkíliði vestur í Winnipeg í Kanada, The Winnipeg Falcons.

Saga Fálkanna frá Winnipeg er stórmerkileg en í sem allra stystu máli var liðið stofnað 1911 af sonum íslenskra innflytjenda í Kanada. Ástæða þess að Íslendingarnir stofnuðu sitt eigið lið var sú að vegna fordóma í þeirra garð fengu þeir ekki að ganga til liðs við heimaliðin í Winnipeg. Fyrsta árið enduðu þeir í neðsta sæti deildarinnar í Winnipeg.

Næstu árin styrktist liðið til muna þegar fleiri og fleiri sterkir íslenskir íshokkímenn gengu til liðs við Fálkana. Veturinn 1919-1920 sigraði liðið í Allan Cup og tryggði sér réttinn til að leika fyrir hönd Kanada á Ólympíuleikunum í Antwerpen í Belgíu 1920. Þá var í fyrsta skipti keppt í íshokkí á leikunum. Liðið vann Tékka 15-0, Bandaríkjamenn 2-0 og Svía 12-1 á leið sinni að sjálfu gullinu. Semsagt yfirburðalið á sinni tíð.

Fálkarnir eru semsagt fyrstu – og einu – íslensku gullverðlaunahafarnir á Ólympíuleikum. Í sigurliðinu í Antwerpen voru eftirtaldir: Robert Benson, Walter Byron, Frank Fredrickson (fyrirliði), Christian Fridfinnson, Magnus Goodman, Haldor Halderson, Konrad Johannesson, Allan Woodman, Lou Marsh (framkvæmdastjóri), Herbert Axford (þjálfari), Bill Fridfinnson (ritari) og Gordon Sigurjonson (þjálfari).

Þrátt fyrir hinn glæsta sigur í fyrstu íshokkíkeppni Ólympíuleikanna fengu Fálkarnir ekki viðurkenningu heima í Kanada. Sigri þeirra var eiginlega afneitað og það var ekki fyrr en 29. apríl 2006 sem liðið var formlega tekið inn í hið svokallaða “hall of fame” hjá kanadíska íshokkísambandinu.

Á vefsíðunni http://www.winnipegfalcons.com/ er að finna ítarlegri upplýsingar um sögu liðsins og tengla á ýmsar upplýsingar sem tengjast liðinu. Einnig er fjallað um þátttöku liðsins í Ólympíuleikunum á vef kanadísku Ólympíunefndarinnar á þessari slóð: www.olympic.ca/EN/organization/news/2006/files/bio_falcons.shtml

Efri myndin er af liðinu frá 1924 en sú nýrri var tekin þegar nýtt lið með nafnið Winnipeg Falcons kom til Akureyrar og lék gegn kvennaliði SA. Svo skemmtilega vildi til að tveir liðsmenn úr krulluliði Fálka, þeir Árni og Haraldur, voru starfsmenn á leiknum og létu að sjálfsögðu mynda sig með Fálkunum frá Winnipeg eftir leikinn.

Merki Fálka

2004-2005

Haustið 2004 hófu Fálkar keppnistímabilið með óbreytt lið frá því um vorið. Liðsmenn voru þeir Ágúst Hilmarsson fyrirliði, Árni Arason, Haraldur Ingólfsson, Júlíus Fossberg Arason og Sigfús Sigfússon. Upp úr áramótum urðu síðan breytingar á liðinu þannig að Fálkar fóru í frí en liðsmenn dreifðust á þrjú lið.

Meira af gengi Fálka haustið 2004.

2003-2004

Nokkrar breytingar urðu á liðinu í upphafi vertíðar 2003-2004, meðal annars í tengslum við Danmerkurferð. Fálkar áttu góðan vetur og urðu meðal annars fyrsta liðið til að leika til úrslita á Ice Cup. Liðið missti naumlega af Íslandsmeistaratitlinum í bráðabana gegn Ísmeisturum.

Meira um gengi Fálka 2003-2004

2002-2003

Árangur liðsins í öðru Íslandsmótinu, sem fram fór á tímabilinu 5. febrúar til 9. apríl 2003, varð mun betri en í því fyrsta. Þegar upp var staðið voru Fálkar í 2. sæti og fengu silfurverðlaun. Fimm lið tóku þátt í mótinu og var leikin tvöföld umferð, allir við alla. Ein breyting varð á liðinu frá því veturinn áður en Leifur Ólafsson hætti og Haraldur Ingólfsson kom inn í liðið skömmu fyrir Íslandsmót.

Meira um gengi Fálka 2002-2003

2001-2002

Fálkar tóku þátt í fyrsta Íslandsmótinu í krullu sem fram fór 11. febrúar til 20. mars 2002. Fjögur lið tóku þátt í mótinu og enduðu Fálkar í neðsta sæti með fjögur stig eins og Víkingar.

Meira af gengi Fálka 2001-2002

Fálkarnir - upphafsárin á Íslandi

Sagnaritari Fálkanna hefur ekki rannsakað fyrstu árin til fulls en um leið og upplýsingar liggja fyrir um liðið, leikmenn þess og þátttöku í mótum verður þeim komið á framfæri hér. Rétt er þó að nefna tvo menn sem spiluðu með liðinu fyrir þann tíma sem samantektin hefst en það voru þeir Hinrik Þórhallsson og Jóhann Möller. Hvorugur þeirra stundar reyndar krulluna í dag.